ພະທາດອີງຮັງ

ພະທາດອີງຮັງ ແມ່ນຕັ້ງຢູ່ບາດທາດອີງຮັງ ເປັນມໍລະດົກຂອງຊາດ, ເປັນພະທາດທີ່ສັກສິດ ແລະ ເປັນທີ່ສັກກະລະບູຊາ ຂອງຊາວແຂວງສະຫວັນນະເຂດ ພະທາດອົງນີ້ ສ້າງຂື້ນປະມານ ພສ 500 ເຊິ່ງນໍາພາໂດຍພະເຈົາສຸມິດຕະທຳ ຜູ້ປົກຄອງເມືອງມະຣຸກຂະນະຄອນ (ອານາຈັກສີໂຄດຕະບູນ) ເພື່ອເປັນອານຸສອນວ່າຄັ້ງໜື່ງພະພຸດທະເຈົ້າ ໄດ້ສະເດັດມາໂຜດສັດໃນແດນສຸວັນນະພູມ ແລະ ໄດ້ນັ່ງສັນເຂົ້າ ອີງຕົ້ນຮັງ ຈຶ່ງໄດ້ເອີ້ນຊື່ວ່າ: ພະທາດອີງຮັງ

ພະທາດອີງຮັງນີ້ໃນເບື່ອງຕົ້ນເປັນພະທາດນ້ອຍມີ 4 ລ່ຽມ, ໃນປີຄສ 1548, ພະເຈົ້າໄຊຍະເສດຖິລາດ ແຫຼ່ງອານາຈັກລ້ານຊ້າງໄດ້ພາປະຕິສັງຂອນ ໃຫ້ເປັນແບບສິລະປະລ້ານຊ້າງ ພະທາດອົງນີ້ ກ້ວາງ  9 ແມັດ ແລະ ສູງ 25 ແມັດເຊິ່ງຍອດພະທາດມີລັກສະນະຄືກັບດອກບົວ. ທຸກໆປີຈະມີງານສະເຫຼີມສະຫຼອງ ເພື່ີອສັກກະລະບູຊາເຖິງພະພຸດທະເຈົ້າ ແລະ ຜູ້ທີ່ສ້າງພະທາດ (ແຫຼ່ງຂໍ້ມູນ: ອົງການທ່ອງທ່ຽວແຫ່ງຊາດ).